Taksa e parkimit në Spital, ja sa janë të ardhurat që përfiton Qendra Spitalore Elbasan nga qytetarët

Sistemi shëndetësor në Shqipëri është kryesisht publik dhe shteti siguron pjesën më të madhe të shërbimeve shëndetësore që i ofrohen popullatës. Mirëpo hera-herës këto shërbime janë me pagesë, si në rastin e shërbimit të parkimit në oborret e Qendrave Spitalore në vend.

Në rastin tonë, Qendra Spitalore “Xhaferr Kongoli” Elbasan, prej shumë kohësh aplikon taksën e parkimit e cila shkon drejtpërdrejt si një tarifë e shtuar në xhepat e qytetarëve elbasanas.  Qytetarëve, iu rëndon edhe një taksë më shumë, të cilën janë të detyruar ta paguajnë sa herë që të futen në ambjentet e Spitalit, pavarësisht kohës së qëndrimit aty. Edhe pse nën zë ata e kundërshtojnë aplikimin e saj, përsëri ata propozojnë zgjidhje lehtësuese në vlerën e tarifës dhe në pagesën vetëm një herë gjatë ditës.

Nga ana tjetër njerëzit duan që komunitetet dhe mjediset të jenë të sigurta dhe që shëndeti i tyre parësor të jetë i mbrojtur. Për këtë arsye ata kërkojnë që paratë e mbledhura nga kjo taksë të investohen në plotësimin e mungesave në spital dhe përmirësimin e shërbimeve. Sepse janë qeveritë përgjegjëset kryesorë për formatimin e sistemeve kombëtare shëndetësore duke pasur parasysh që ky sistem kërkon riparime të herëpas’hershme për t’u përmirësuar.

Sipas një shkrese, dalë nga Drejtoria e Qendrës Spitalore Elbasan, bëhet e ditur se për vitin 2018 janë mbledhur 11 604 310 lekë të cilat përdoren të gjitha nga institucioni spitalor. Gjithashtu, theksohet se për menaxhimin e këtij shërbimi nuk ka asnjë firmë të kontraktuar.

Ministria e Shëndetësisë dhe Mbrojtjes Sociale është hartuese dhe përgjegjëse për zbatimin e politikave  dhe strategjive të sistemit shëndetësor për rregullimin dhe funksionimin e tij si edhe për koordinimin e të gjithë aktorëve brenda dhe jashtë sistemit. Për këtë arsye, bashkia Elbasan në lidhje me çështjen e sipërcituar, ka hequr kompetencat sepse ambjentet e Spitalit i administron dhe i ka në pronësi Ministria e Shëndetësisë.

Në fund të ditës, janë po qytetarët ata që vuajnë financiarisht çdo vendimmarrje të qeverisë në dëm të xhepave të tyre.