Përfaqësues të ambasadës keniane takim në komisariatin nr.1/rasti i 22 vjeçares që u dhunua barbarisht

Dy përfaqësues të ambasadës keniane në Romë po zhvillojnë një takim me shefin e Komisariatit nr. 1 në Tiranë, Petrit Halo, në lidhje me dhunimin e vajzës keniane Joy në kryeqytet, në gusht të vitit 2022. Ata kërkojnë informacion në lidhjet me hetimet që po kryhen për ngjarjen, si dhe nëse autoritetet shqiptare kanë identifikuar autorët e ngjarjes së rëndë.

Dosja fillimisht u regjistrua në prokurori për plagosje të rëndë me dashje, por më pas iu rikthye sërish policisë për t’u plotësuar.

Keniania 22-vjeçare kishte ardhur në Shqipëri për të punuar në një kazino. Më 13 gusht, e reja u gjet e masakruar poshtë pallatit ku jetonte në rrugën ‘Pandeli Vangjeli’. Njoftimi në polici u dha nga mikja e saj ndërkohë që një ditë më parë, 22-vjeçarja kishte folur me të ëmën ku ishte shfaqur e gëzuar për faktin se do të kthehej në shtëpi. E reja kishte qëndruar në një hostel me persona të tjerë në kryeqytet ndërkohë që dyshohet se ka punuar përkohësisht në një kazino në Tiranë.

Hetimet vijojnë për zbardhjen e ngjarjes, ndërsa tashmë pritet verifikimi i celularëve dhe i tabulateve telefonike për të kuptuar mes bisedave të vajzës keniane për të shkuar tek autorët e mundshëm. Priten përfundimet e të gjitha akteve të ekspertimit mjeko-ligjor të kërkuara nga prokuroria.