Ndërkohë që në Shqipëri arrestohen pse protestojnë, ja sesi ndihmohen artistët në shtete të tjera..

Ministrja e Shëndetësisë dhe e Mbrojtjes Sociale, Ogerta Manastirliu në një dalje për mediat ka njoftuar ditën e sotme për vendimin më të fundit të qeverisë për shkak të pandemisë së Covid-19. Në një deklaratë për shtyp, Manastirliu bëri me dije se nga sot është e ndaluar hapja e klubeve të natës, diskove dhe çdo lloj shërbimi të kësaj natyre në mjedis të mbyllur apo të hapur, përveç restoranteve. Më tej ajo theksoi se mosrespektimi i këtij detyrimi nga subjektet, dënohet me gjobë 3 000 000 lekë dhe me pezullim të aktivitetit për një periudhë një vjeçare. Gjithashtu është e ndaluar muzika pas orës 20.00 në të gjithë mjediset e shërbimeve të çfarëdolloji. Mosrespektimi i këtij detyrimi nga subjektet, dënohet me gjobë 1 000 000 lekë dhe në rast përsëritje, me pezullim te aktivitetit për një periudhë gjashtë mujore. Ky vendim nuk është pritur aspak mirë nga personazhet e njohur, por sidomos nga këngëtarët dhe punonjësit e klubeve të cilët protestuan para Kryeministrisë mbrëmjen e sotme.Raportohet se disa prej tyre janë shoqëruar edhe nga policia. Kjo sepse qeveria ndalon grumbullimet e tubimet për shkak të pandemisë.

Kujtojmë gjithashtu se edhe në Mbretërinë e Bashkuar Unioni i Muzikantëve dhe artistët në ditën e sotme i kanë bërë thirrje qeverisë të prezantojë një të ardhur themelore universale për të mbështetur performuesit që nuk janë paguar gjatë pandemisë së koronavirusit. Ata i kanë drejtuar një letër kancelarit Rishi Sunak ku paralajmërojnë se me turnetë dhe shfaqjet e tjera të anuluara për shkak të Covid-19 shumë prej tyre kanë mbetur pa të ardhura dhe se pasiguria që ka ky sektor do të thotë gjithnjë e më shumë që të punosh si artist është e mundur vetëm për njerëz me prejardhje më të privilegjuar që kanë mbështetje familjare për të ndjekur ëndrrat e tyre. Qeveria britanike ka premtuar një ndihmë prej 1.57 mld paund për sektorët e arteve megjithatë paratë kryesisht do të shkojnë për organizatat duke lënë kështu shumë njerëz që punojnë në këtë sektor pa mbështetje. Një e ardhur themelore universale është përfitimi i parave të paguara nga qeveria për të gjithë artistët, pavarsisht nëse ata janë në punë apo jo, si një mënyrë për të mbrojtur njerëzit që humbin punën. Amelia Womack, nënkryetarja e Partisë së Gjelbër deklaroi: “Është me rëndësi jetike që ne të mbështesim artistët tanë, muzikantë dhe interpretues të tjerë që kanë mbajtur shpirtin me shfaqje përgjatë mbylljes, pavarësisht se shpesh shqetësohen për situatat e tyre të pasigurta financiare.”