Rreth 40 punonjëse të një rrobaqepësie në Fllakë të Durrësit kanë pasur simptoma helmimi. Ato që janë ndjerë më keq kanë shkuar në spital.
Mësohet se aktualisht 7 punonjëse po marrin ndihmë mjekësore në spitalin e Durrësit, ndërsa 2 janë dërguar në Tiranë.
Punonjëset e helmuara janë të repartit të hekurosjes dhe dyshohet se helmimi ka ardhur nga solucioni i hekurosjes. Punonjëset janë ndier keq, duke pasur të përziera dhe të vjella.
Nëndrejtori i spitalit të Durrësit, Genti Kavaja pohom se gjendja e tyre është e stabilizuar dhe nuk paraqesin probleme të rëndësishme. Vetë gratë që gjenden në spital thanë se në repartin e tyre të hekurosjes 40 punonjëse kanë shfaqur simptoma. Por ato që janë ndjerë keq janë paraqitur në spital.
Dyshohet se shkak ka qenë një solucion që përdoret në hekurosjen e rrobave. Megjithatë do të jetë Inspektorati Shëndetësor Shtetëror dhe Drejtoria e Shëndetit Publik të cilët kanë marrë mostrat e analizave të punonjësve së bashku edhe me Inspektoratin Shtetëror të Punës kanë nisur inspektimin në rrobaqepësinë që gjendet në periferi të Durrësit.
Ky nuk është rasti i parë që ndodhin ngjarje të tilla. Dy muaj më parë në një tjetër rrobaqepësi në Durrës punonjëset u helmuan dhe qëndruan disa ditë në spital, ndërkohë që shkaku i helmimit nuk u përcaktua nga autoritetet. Gratë e rrobaqepësisë si në verë dhe në dimër shprehin shqetësim për kushtet e punës që kanë të bëjnë kryesisht me aspirimin e ambienteve ku punojnë.
COMMENTS